ગાંધીબાપુ... - ભાવેશ ભટ્ટ

પોતડી, ચશ્માં અને એક લાકડી;

જે હજારો તોપને ભારે પડી!

સત્યને સ્હેવો પડયોતો રંગભેદ!
લાલપીળી થઈ ઉઠીતી એ ઘડી.

છાપ આખા વિશ્વ પર પાડી ગઈ!
દાંડી યાત્રાએ ગયેલી ચાખડી.

પાંચ ફૂટની સાદગી શું વિસ્તરી?
આખી આ દુનિયા પડી ગઈ સાંકડી.

અંધશ્રદ્ધાથી ગુલામી દૂર થઈ,
બાંધી ’તી વિશ્વાસની નાડાછડી!

રેંટિયામાં કાળને કાંતી લીધો!
કાળને એની સમજ પણ ના પડી.

ઘરના બે ટુકડા થયા, સળગ્યા પછી
બંધ આંખોમાં અહિંસા તરફડી.

મોક્ષને પામી ત્રણેત્રણ ગોળીઓ!
ચામડીના તીર્થમાં એ જઈ ચડી!

- ભાવેશ ભટ્ટ